تحدي

غَرَّبْتْ غَالِبْ ومن يبغي الغَلا غَربْ
ومن كان سامي سما للمركز السّامي

والّلي يبي ونعم لازم لاجْلَها يتْعَبْ
واليوم له مجد وانسى مَجْدَكْ العامي

ما بين سِبْع فْ عَرينه وْسِبْع مِتْخَضبْ
بالدمْ فَرْقٍ يدِلّكْ نابه الدامي

يا كاتِبْ المَجْد عن لي يصْنَعون اكْتِبْ
شبابنا لي لهم راياتْ وعْلاَمي

ويا عاسِفْ الخيل لا تحْزَنْ ولا تغضَبْ
ما نرتضي غير الأول دُومْ قدامي

من حبّي الصَّعْب أطْرَبْ كلّمْا يصْعَبْ
متْعَوّدٍ بالشّدايِدْ هايِمْ هْيَامي

أتْعَبْت الأرضْ التّعِيبه وما رضِيْتْ أتْعَبْ
واتْعَبْت طير السما واتْعَبْت لُوامي

أَغْلِبْ ولا اغْلَبْ وحَدِّ يَغْلِبْ ويغْلَبْ
ومن غَالَبْ الغالبين يْغَلْبهم زامي

في ساعَةْ الصّفْر حَتّى الشّخصْ لمْجَربْ
ياما ارْتِبَاكٍ يِجيه وخوفْ واوْهَامي

وانْ زَادْ هَمهْ فلا ياكل ولا يشْرَبْ
واذا تخطى حدود الهَمّ ما يْنَامي

كِنا وكانوا على عَجْلاَتْ تِتْوَثبْ
والأَرْض سرْجْ وْعِنَانْ وسيرْ ولْجَامي

والخيل تفْهَمْ لمن صَهْوَاتْها يرْكَبْ
إن كان في الحَزْم حازِمْ شَد لِحْزَامي

فزْنا وكلّ العَرَبْ من فَوزنا تِكْسَبْ
والنصْر نَهْدِيْه لِشْعوب وحكامي

محمد بن راشد آل مكتوم