الله لنا

‎لو حرّك الغصن الأخضر باردك يالنسيم
‎ما حرّك الشـوق عـود الزين يوم إنثنى

‎تسـتحقر نفوسـنا شـيٍ لو إنّـه عظيم
‎لا صـار درب الوصـول المكسـبه ذلّـنا

‎أسرار قلبي بعـيده عن عيون الحـريم
‎لو ان عيـون الحـريم تـزيد قلـبي عـنا

‎أسـامر اللـيل وحدي كن ما لي نديـم
‎بس النديم الحقيقي قاف شعري وْأنا

‎أهيم والشـاعر إيلا ضاق صـدره يهيم
‎لو كان شـيخ وحـياته بين رغـد وهـنا

‎إحساسه المرهف يحسِّـسه بأنّه يتيم
‎بالرغم من كثرت احـبابه هناك و هـنا

‎يسـاهم فـ هدم ذاتي كل جـرحٍ قديم
‎والـذات يحـتاج بسـمه تدفـعه للبِـنا

‎الله لنا في الشـقا ، والله لنا في النعيم
‎شـيـوخ و مواطـنين نـردّد ( الله لنـا )

حمدان بن محمد بن راشد آل مكتوم